滿足晚餐！無肉邊爐配任食雪糕

其實我唔係集中想寫食評.. 我又唔係成日周圍食野....
但抵食夾大件果時又想話比大家知...
咁尋晚同兩個窮女人去左藍田海港打邊爐 ~
極度推介一大班窮鬼素食者黎烚下烚下聚舊
因為佢只需每人收費38蚊~ 另外再叫個湯底 ~~ 大約$48至$68
就可以任食 菇 / 菜 / 京麵 / 烏冬 / 汽水 / 雪糕 等等~
( 本身仲有水餃, 點知黎到先知無供應 )


湯底我地就揀左雞腳鍋 , 因為可以損腳趾 XD 幾好味!

哩堆野呢，就係任食ge ~ 好多菇! 正!

汽水都係自由針~ 另外仲有兩款涼茶添~ 我記得有夏枯草

咁如果想食肉 / 另外叫料呢, 就由10蚊至百幾蚊ge海鮮不等
都平架 ~ 個芝士年糕仲好好食 :p
不過朋友話響鈴好麻麻, 提左我地千祈唔好叫 ~

去酒店自助餐，有無哈根大師雪糕供應，對女人黎講係好重要
而去打麻甩邊爐，有無雀巢雪糕，都一樣咁重要！！！！！
最後３個大家食左咁多．．．（影少左一杯）

海港酒家

地址：好多分店！入官網自己搵
電話：2379 9089
官網：按此

沖繩都有扮晒野 Afternoon Tea? ~ Wired Cafe 沖繩祭 !

法國貴婦呢，就習慣好晏先起身，第一餐就係豐盛的 Brunch，之後就出街擺靚靚 ~

而英國貴婦呢，就中意食豐盛早餐，輕食午餐，可能又唔洗好似巴黎貴婦咁每日出街擺靚靚（點解咁講？等睇兩日後我出篇非專業書評啦！）之後就行行企企做咩好呢？Afternoon Tea 啦 ~！咁我哩個香港出品窮貴婦應該做邊樣好呢？？咁上月某日，就特登同3個女人著到靚一靚出街為 High Tea ! ! 目的就係要扮 晒 野!! 咁我個名就叫窮貴婦, 扮野得黎都要睇住個荷包 ~ 咁就揀d 價錢平民化少少 又有特色ge Tea Set 黎比我 high一 high 止一止癮啦~

之前黎到Wired Cafe 食晚飯（睇哩個，拉到最底啦：低頭族必備物! Eyefi Mobi WiFi SD card），知道原來Wired Cafe沖繩祭仲有得Tea Set．咁既然晚飯好好食，就約左３個女人試埋個Tea Set 啦 ~ 

$148 for 1 person , 價錢黎講都 ok 平民下

( 再平我諗我真係要係屋企拎個蒸架加三隻鋼碟 ~  )

我地４個女人就叫左 2 個High Tea Set, 

 餐廳亦規定, Minimum order 係2個set

咁個Tea Set 有 d 咩呢? 自己睇相先啦

通常女人都係睇完張相就話" 好靚好似好好食 " 其實根本都唔洗知食咩 XD

咁呢，話晒係日式西TEA呢～就當然同平時有Ｄ唔同

但有Ｄ仍然係會保留ge~ 咁我最底層講起先！

底層：三文治, 迷你漢堡 , 日本團子

咁呢，個三文治係ok ge~ SIZE 都貫徹傳統

要盡量細小，一口食得到．

不過個迷你漢堡, 要一口就有d 難度, 各位貴婦要小心d  ~ 但味道不錯! 我好怕d 超級乾身漢堡 ! 哩個絕不乾身 ~

而個紅豆蓉x丸子, 我覺得應該放係最高層, 因為我覺得好甜！

不過友人都話ＯＫ~ 可能我係最後一個食, 浸到超級甜 ~ 

中層：英式鬆餅, 泡芙

HIGH TEA 必有鬆餅，亦有必備牛油，clotted cream，士多啤梨果醬 ~ 

基本上係無得輸ge 一層．而泡芙又細細件，入口即溶咁，夏天的感覺呀~~~~

上層：芝士蛋糕 , 馬卡龍, 士多啤梨

老實說，哩一層我最中意食士多啤梨　XD

因為我本身唔中意食馬+癃 ~ 又對芝士蛋糕唔太熱愛

而飲品選擇都唔少架~ 除左咖啡什麼的~ 仲有果汁啦, 梳打啦 , 乳酸飲品啦, 仲有cocktail

總有一杯會0岩你心水ge ~ 

雖然今次我係講食，但環境方面我都想提一提

上一次黎，我坐係餐廳暗角位，感受唔到咩特別氣氛～

今次４條女，坐係窗邊卡位～

原來景觀都不錯丫！！

４條女一坐低就講「哩度都幾舒服架喎...」

可能係因為側邊就係窗台玻璃，有自然光線～而對面係sogo~ 哩度14樓 ，景觀並無被其他高樓大廈遮蓋 ~ 自充足自然光 ~ 

如果大家同另一半黎食野，建議即使要等，都等下窗邊位

真係比其他位來得舒適　～

不過呢，講左咁大堆

哩個沖繩祭已經完左喇，想食就梳 li 喇 ~ 

Wired Cafe好多食品都係期間限定架咋

而 7 ~ 8 月係佢呀！　Kumamon 熊本熊！

不過呢.. 剛剛係FB 睇到..

" 7月至8月既Booking都全滿了,不過仲有枱可以walk-in "

大家想去又未BOOK就要去等下喇!

另外，我建議餐廳換一換走哩隻茶記水杯...

定係哩隻水杯係日本傳統？

手袋 DIY - 啡紅仿皮長方石串Clutch bag

因為整完出黎唔係太滿意，所以我都唔知可以講咩

設計個款我係滿意，只係初哥遇到好多問題，令到手工唔夠靚

不過由於我太喜歡個設計，所以我係會再整多一次 ~ !!

我個人係好中意長方石，爪石好，平石好，我都好喜歡

原設計係造淺粉色，但搵唔到0岩心水ge布料

而誤打誤撞遇到哩一色好鬼襯我ge顏色 ( 嘿嘿 ) ~

所以就.... 用左佢啦!

廢話唔講~

直接睇圖

車晒D布佢~~~~~ 因為外層仿皮都幾厚, 又有層棉質咁 (雖然厚, 但好易車)

我通常用 好易摵膠紙代替粉筆去畫布~ 又直D~ 搞掂就撕左佢

因為係新手, 條邊留多D~ 之後剪仲安全!!

搞掂喇!! 反轉啦~~

之後就係袋的重點! 穿珠仔!

因為條魚絲同埋粒石個癃一樣大咁濟, 難穿到嘔...

 

淨係穿會怕斷, 咁加D膠水痴左佢~~~~

袋左野之後, 係咪都呃得下人呢?!!!

遠睇都幾可觀架~

因為影到太含羞 , 所以容許我戴個面具 XD

一套應該要掉低男友睇0既電影《GIRLS閨密》

尋日去左閨蜜試映會
其實早係收到試映會邀請前，我已經約左班八婆8月上畫要去睇 ~
咁E+ 有試映會，梗係都係同八婆睇啦！！

"閨蜜" 哩個字對香港人黎講，可以話陌生左少少 ~
其實就係我地平時所講ge "好姊妹" ~ 即係我口中ge "八婆"

哩套電影講述三個關係親蜜但性格完全唔同ge女人，廿年間ge姊妹情 ~
Kimmy（薛凱琪飾），希汶（陳意涵飾）及小美（楊子姍飾）
一個有錢任性而且中意同男人"玩"
一個開朗乖乖女
一個外表cool cool地但內心其實幾純情又有理想
我諗睇劇照，大家都知道係邊位演員飾演邊個角色～

睇完之後，可能有人會話唔中意Kimmy ge 角色，會諗"佢現實應該會無朋友" ~ 但假如身邊真係有一個咁ge姊妹，你會感受到佢真心對朋友好．同男人點玩？由他吧～ （當然唔係指由佢踩落屎坑跌落火坑啦）

而希汶, 係我幾中意ge角色 ~ 可能因為我偏心陳意涵，我一向幾中意睇佢做戲～ 有一PART係講佢被未婚夫拋棄，之後碌大雙眼訓係天台地方，哩一PART～　我尤其喜愛～　佢個眼神.... 睇到心都酸埋 ~

一班八婆，梗係要配D男人啦 ~
男演員有 余文樂、鍾漢良、吳建豪

好想提一件事
余文樂每次一出場，我附近總係聽到有ｄ深呼吸聲、"嗚呀~"叫聲 ~  哈哈哈哈哈
真係不得了 ~~ 我又唔想劇透 ~ 但可以講一句，睇完大家會講 " 現實邊有余文樂咁架 "，但心底會講一句 "有余文樂咁ge男人就好喇 " ~ 又有朋友講 " 搵個無咁靚仔會唔會現實d " ~ 真係屌~~~ 唔靚仔你就唔睇到發姣啦 XD

吳建豪，大家可能覺得佢好CHOK ~ 但其實應該係角色好chok ~ 再搵番個chok 演員做哩件事 ... 所以我覺得有10個match ~

導演係黃真真
對我黎講最有印像係六樓后座 & 分手說愛你
佢ge電影，有時真係假得黎夠真！
甚至有d人覺得，唔洗睇故事大崗～知道係黃真真導演就覺得有保證～
對我黎講係 " 點都值得一睇 " ~ 至少睇完唔會屌
今次哩種電影 , 選角我覺得真係好好 ~

有樣好重要ge應該要講
哩套戲 好 好 笑 ! 笑位超級多!!
有好多地方會笑, 係因為你平時有同身邊d 八婆講同理型說話 ~ 做同類型ge 事 ~ 有同一個反應 ~ 有同一個咀臉 ~
雖則套戲叫"閨蜜" ~ 但係我就覺得講少左d 姊妹間ge事，多左少少感情線～　可能係因為想用感情事去帶出姊妹情～　但真係少左ｄ ~
除此之外，哩套戲，都真係幾滿意～

女人之間ge好姊妹 ~ 總有一個特別ge溝通方式&相處方式
見到靚仔，幾姊妹間打個眼色再大笑，一齊設計下幻想對白"如何撩靚仔"（但從來無行動過XD） ；打牌打幾粒鐘都未有４圈，旁觀者睇到眼火爆，但我地哩Ｄ叫八婆吹水牌你又識條春咩～ 唔開心時，會同你傾電話，同你發呆，陪你訓，煮麵你食～

中學時，你會知道哩Ｄ人係你好朋友
到出黎做野，你會知道佢地係你好姊妹
到日子耐左「八婆～我地著靚靚去食餐扮野飯」
（其實只有八婆之間放心比大家見素顏，仲扮乜野丫~）
但哩d 就係你ge  " 閨蜜 "  !

哩套電影，如果你有興趣睇
我真係麻煩你，掉低男朋友一日
去搵個八婆(好姊妹)一齊睇，跟住去食個飯～
擺靚靚，影張相 ~ 之後你會覺得~ 每次睇哩張相時，會開心過睇拍拖合照
閨蜜，就係一個咁ge存在 ~

一個令伴侶都會呷醋ge存在




講到尾，睇下預告啦大家

Facebook : https://www.facebook.com/girlsguimi/info

上映日期： 2014年8月7日

蕎麥麵初體驗遇上爽口牛舌 ?! 黑瀧板蕎麥專門店 Kurotaki

哩一日呢，我就同朋友去左世貿搵野食；
本身明明諗住去吉烈專門店，正想拎飛仔期間，見到隔離舖原來係友人好中意食ge蕎麥麵~ 咁就去左隔離拎飛仔喇！而哩間就係 "黑瀧板蕎麥專門店"

咁都等左20分鐘左右，期間其實都幾多人埋單走人，但就無乜放過人入去；我諗係執枱耐左ｄ掛；不過又唔算等好耐，ＯＫ啦～

入去坐低，坐位係同旁邊張相"算" 係有間隔，但張枱唔係間開左，我諗係空間感大Ｄ～無咁焗束；
（但其實假如隔離唔係食鐵板燒(?)，我地Ｄ煙攻晒去隔離，我都鄧佢地辛苦....）

咁叫野食先～　咁早係等位期間，兩條友仔已經一早鎖定 " 蟹膏牛舌燒 蕎麥餐" (個名係我求其改, 因為我根本唔記得) !
咁叫完呢，就好似好快有野食～　但一切只係假像～～～～～～只係放低個醬汁快，其他野一Ｄ都唔快 XD　
我係唔明白，Ｄ野係我燒；究竟... 佢需要準備ge....係邊度.....

不過女人吹下水時間好快過，是但啦～
咁D野到齊喇 ～ 張枱係唔夠位擺哩個set ge.... 開頭職員直情係擺到有d "錯" .... 　係為俄羅斯方塊式咁放晒D野上張枱，唔需要諗你點樣用餐；係咁細張枱放咁大壇野應該係一個高難度動作，但我相信我地唔係第１個叫哩個SET ge 客人 ~ （不過之後有大粒少少ge 黎執執佢）

雖然講就咁多唔鋸，但係食黎講，我哩一餐都係滿意ge ~
但最滿意在唔係ｄ麵，只係牛舌～
麵唔知係咪整完pat係度太耐? 有d 痴痴地, 想夾一住變左一大舊... lol

不過呢... 我第１次食蕎麥麵咋，講起都醜醜地；都係因為我次次都係食烏冬，有蕎麥麵我都轉烏冬 XD 咁今次獻出我第１次, 我覺得OK ge ；老實說，其實我根本唔知應該係咩口感咩味道 XD 總之就入得口啦～　但友人本身中意食soba~  佢都話滿意ge  :-)  而蕎麥麵醬汁，友人覺得要多Ｄ wasabi，而我覺得要多少少薑 ~ 就可以更好喇 ~

講番條最愛的脷~  好爽口！不得了！完全覺得唔夠滿足！想係咁食係咁砌 ~ (不過其實我地２個都係食完成個餐就剛好夠飽～只係心靈不夠滿足)

咁哩個SET呢，附有兩個醬料可以點牛舌，一個係燒汁，一個係蟹膏汁(?)  ；其實我比較習慣食野唔點醬料，不過我覺得點牛舌的話，燒汁好食Ｄ～但蟹膏汁唔係唔好食，只係配牛舌，會變左無乜味；我誠意推廌大家...　直接飲左佢 XD

我無搞gag！我同朋友都唔記得自己哩個係蟹膏牛舌燒～用筷子點下點下都試唔到咩味，就問下職員，呀～原來係蟹膏～　跟住我地決定直接拎起隻杯痴落咀試味 ,  UM.. 好好味！！！之後直情當粥咁飲晒佢 ~ 唔會太濃太咸，直情想添飲（不過無可能啦 XD）
除左牛舌～仲有各種菇，南瓜，洋葱可以燒～　味道都是OK的~  只係果一舊仔牛油真係唔夠...(假如分開2次燒的話) ...

$200有找一個SET~ 價錢都OK LA~!!
雖然口賤講到好似好唔鋸咁，但我係會翻啅佢！　睇下除左條脷仲有咩好食！

=============================================

黑瀧板蕎麥專門店 Kurotaki

地址：銅鑼灣告士打道280號世貿中心413-415號鋪

電話：2711 6362

營業時間：星期一至日: 12:00-15:00;18:00-22:30

=============================================