Sylvanian Families 森林家族 - 車仔檔開箱文

森林家族 ~ 我諗好多人都會中意 ~ 但未必會買 ~ 

因為又貴貴地, 又唔知擺係邊度 ~

但前幾年開始決定唔理咁多 ~ 買一盒細ge... 再買一盒細ge .. 

唔理會旁人話我同細路仔爭野玩架喇!

不過都未有"勇氣" 去抱住盒大番屋企

上年5月第1次去日本 ~ 最後一日去左梅田果間 " 激安の殿堂 ドン.キホーテ "

一去到玩具部~ 嗚呀!!  我見到森林家族呀 ~ 平過HK好多呢... 大盒都係2百多元咋!!!

跟住.... 我就MOU係度左揀右揀喇 ~ 完全唔理由點樣拎番HK (我係無拖喼架)

最後.... 有控制力之下揀左兩盒

其中一盒就係以下哩個喇!

買左成年幾, 終於忍唔住開箱喇 !

打開盒, 好整齊地只有哩3樣野, 絕對唔係散修修

一架大車 ~ 一部配件 ~ 一張貼紙 (仲有本薄薄故事書仔架)

開左架車仔先! 好心急! 好心急!

開完之後我唔明, 點解吊吊FING ge~ 

睇相明明反完係水平面架!! 點解唔係ge?!!!!

研究左一輪...   原來....

之後無端端又發覺右邊有兩粒野突起... 以為係按鈕...

點知拉到出黎!!!   果下真係好開心 lol  開心大發現咁

仲有咩可以開呢... 

跟住就係拆細配件時間喇!

除左杯杯碟碟, 仲有好多野食架!

雖然盒外張相有好多人仔~ 但其實哩盒野係唔包"人仔"架~

所以我邀請左熊爸熊仔黎試食

仲有馬騮仔黎左做暑期工

兩隻野咁串咀話要即叫即做

好.... 暑期工要聽聽話話

熊爸爸之後同熊仔上左上層開餐喇

 (雖然我都唔知佢地點樣拎住個餐盤爬樓梯)

放大睇真係好過癮...

因為佢地真係可以拎到個盤... 嗚呀!!!

終於可以食野喇...

三十幾五十歲人~

無端端開箱好開心咁係度玩森林家族 .... 哈哈哈

唔理LU~ 開心就得啦

後記 : 熊仔件衫唔見左 ~ 有保護動物組織睇唔過眼~ 捐件衫比佢地 ..

真心多謝

耳環控的收藏方法分享 ~ 不美觀但絕對實用

同我有點熟ge朋友應該都知道，我係一個首飾控

尤其係耳環最嚴重

應該都接近100對 ~

究竟應該點收藏呢? 

= 方法1 =

有d 人會用d 分格膠盒入起晒佢 ~

但對於100對的我黎講~ (仲要有好_大隻款 或者 好鬼長款 , 甚至不能亂塞的羽毛款 )

哩個絕對不是好辦法

= 方法2 =

我咁中意古典野 ~ 點解唔用d 耳環架呢?

一對二對好似首飾舖咁掛晒係度 ~ 好_靚! 正到痺丫!

但我係 一 定 唔 會 咁 做 !

如果你用緊哩個方法, 有無發現 D 首飾好快就變暗啞?

因為已經氧化左喇 ~ ~ 

同埋貓貓爪落耳環架度都收左我皮啦

所以哩個方法絕 對 不 行 !

為防氧化, 所有首飾我都會用膠袋入起 ~

咁會保存得好耐好耐 (除左戒子會用一大個戒子盒 ~ 因為咁樣放實在太靚 XDDD)

= 方法3 =

既然一包包入起晒, 咪是但搵個籃放晒落去囉

同你摺衫一樣 , 最底最底果堆應該最少機會出場

因為你見到面層果D 都已經揀左LU...

又要易搵, 又要防氧化 ~ 

我就介紹下我ge做法啦

(1) 首先要買右手邊個白色櫃仔 ~

係AEON 12蚊店買ge~ 每一層24蚊 ~ 好處係可以不停疊上去!! (我依家有5層 !)

左邊果堆係材料 ~ 

魔術貼 , 雙面膠紙 (有d 魔術貼本身背面已經雙面膠) , 硬膠片 , 針 , 啪啪膠袋 

(2) 睇下近鏡...   好似CD櫃咁, 掃掃掃咁就揀到耳環喇 ~ 

(3) 咁就開始整喇

剪一塊硬膠膠膠片, 搵針吉兩個癃 ~ 

吉對耳環落去, 再放入啪啪啪啪袋

(4) 咁就剪一張透明膠片 , 細過個櫃仔少少咁啦~

用魔術貼, 貼袋耳環落去~ 睇下耳環幾大就貼幾多袋啦 ~

(5) 搞掂一排 , 放落去睇下咩樣 ~

(6) 可以隨意用以下各種排法 ~~  ~ 有D 細粒我仲一袋有3對, 每份可以有好多對 XD

因為之前無晒魔術貼, 有一堆耳環無"上架"
今日搞晒佢~~~

明知不美觀 , 但絕對實用呀 !

分享完畢 : p

Byebye 你條尾~~~~~~ cleen 光滑、淨白、無痛彩光脫毛～

脫毛毛，好似係女性必做項目咁
唔會洗錢打扮護膚ge女人，都會去脫毛毛
而有Ｄ男人，誇張到係唔知女人有腋毛哩樣野
好啦，既然你唔知．．．我就去清左佢，以免比人當男人看待．．．

咁多年來，我都係用夾毛毛方式去清除腋毛～　趕時間就剃
但係.... 真係會帶黎好多壞影響

	剃毛刀	：容易刮傷，膚色暗沉
	蜜蠟	：撕扯不當，毛髮斷留毛囊
	拔毛鉗	：毛孔越來越粗，毛髮倒生，甚至同一毛囊長出數根毛髮

( 以上資訊由 cleen 毛毛博士話你知 

)

咁前排就收到cleen 邀請去試用彩光脫毛毛服務
咁為左腋下變番一個女人腋，我就去啦

cleen 可能比較少人聽過，因為佢係一間新公司
點解夠薑試佢？因為佢係NEO DERM集團旗下新品牌，reenex, elyze, dermes都係同一集團下，都有Ｄ信心～（好多人用ge "紅水" ～ bioderma 都係佢架）

佢採用新一代歐盟認可700-950 nm「光學淨滑」脫毛技術，以較短波段光源集
中深入毛囊，針對黑色素，破壞毛囊，做大約10~12次左右～就可以完全向毛毛講聲＂BYEBYE你條尾＂～～～～


試第１次喇~
當日紅黃紅黃暴雨警告，全身都濕晒～ T^T
一上到去，Reception 姐姐就問我洗唔洗去洗手間～～仲接走左我手上把濕晒的遮
抹完個身，出番黎坐陣～
有位嬸嬸就問我洗唔洗飲杯野~ 有熱菊蜜同埋竹蔗矛根 ~ 我以為只有熱茶~ 哈
揀左杯熱菊蜜暖一暖個身 =v=
之後填番D 資料 ~ 無耐就有治療師黎接我走，去左間房度傾偈～
都傾左成個幾鐘．．．．　不過過程係愉快ge~ 只係姐姐太健談 ~ 各方面佢都講解得好清楚～
為左我清楚, 連自己d 毛毛都比我睇 lol
不過我諗，大家想聽就聽，唔想聽咁耐就stop佢～應該無問題的啦 ~~~~~

之後入另一間房做療程 ~
首先幫我睇下腋下毛髮情況，之後幫我用剃刀剃，再用bioderma 支紅水幫我清潔乾淨～

（大家記住，出去做彩光脫毛前，要留番少許長度毛髮～唔好鉗走晒佢～因為無個毛頭點同你脫呀？　不過唔排除有ｄ新科技可以咁做，而我識條春je~ 不過邊間公司都好，預約時都問清楚啦）

咁戴副超～　佢就幫我係脫毛範圍搽ｄ啫喱～ 之後就開始脫毛毛喇 ~
貼住皮膚一路碌一路碌～
一開始凍凍的，之後越黎越暖，微熱～姐姐話哩ｄ叫漸進式什麼的

我自己未做過任何光學脫毛
但做過彩光去斑～相比起黎，今次脫毛係絕對絕對絕對無痛～ 比蟻咬ge感覺都無 ，我只感受到凍凍凍暖暖暖熱～ ...  怕痛囡囡可以放心 ~

之後照鏡，睇番～
毛有無清到，其實我唔會知～　因為佢用剃刀剃左先架嘛
但好肯定係白左，無開機之前咁暗咁黑～摸落係明顯滑淨左　（不過我好易紅～用紅水抹幾下就紅左，張相睇唔到效果～sorry XDD ~ 不過番去Mr.K話好神奇，白左好多～ XD
）

咁之後執番ｄ個人物品，又番去房仔傾偈喇
咁價錢係... 有講ge~ cleen光學淨滑脫毛腋下療程~ $3,888 / 10次 ~
其餘部位就唔同次數有唔同折扣啦~ (詳情就自己向職員詢問嚕 ~ 因為我都唔太記得~ 哈)
不過哩度比某部份美容公司唔同，係明碼實價，無海鮮價，唔會隨便篤計數雞就話你知又平左200 ~ 絕對無~
hard唔hard-sell就... 可以講話"治療師有很好落力的銷售技巧"
我有三次試用機會，我就會試完３次睇效果，雖然試用完即刻購買係會抵左，但真係有效的話，我唔會介意之後先比正價 :-)
（３次只會少左ｄ毛毛，都知唔會話清得晒，但我至少想睇係咪真係光滑淨白左嘛）

無謂我講咁多廢話，接落黎交番比代言人顏卓靈小姐～～～

如果睇完篇又想試下，美女們師奶們可以入Click入哩度
就可以同我一樣，有３次免費光學腋下脫毛療程連毛髮分析 (總值HK$3,150)
（經官網試用都係得１次咋....）




cleen光學淨滑脫毛中心地址
銅鑼灣金朝陽中心38樓 2682 9200
旺角朗豪坊辦公大樓32樓 2338 1288
免費咨詢熱線：3511 7488
網址：http://www.cleen.com.hk/



* 療程、脫毛資訊、公司資料由「cleen光學淨滑脫毛中心」 提供

ASUS x Fashion & Beauty 腦力提升工作坊

華碩 ASUS ~ 對我哩個半IT 女子黎講，唔算話好陌生～至少賣他牌Router時都見過有客人揀ASUS Router ~ 而前幾年ASUS又因為細細部ge EEEPC 而令大眾加深左認識  ( 我自己都有一部 : p )

咁其實半年前左右，都有上下論壇仔問下各位IT朋友，究竟有咩平版好用，尤其係我想用黎寫website dump下code ~ 咁有位同行哥哥仔 介紹左我用ASUS T100 ... 不過到E+ 都無買啦 ～　女人仔嘛～買女人野比錢好爽手，買科技野諗勁耐

咁適逢見到Fashion & Beauty 同 ASUS 有一個 " 腦力提升工作坊 " 的東東 ~ 我就參加左喇 ~ 至少可以認識多 D ~ 唔洗一頭霧水情況下刨開箱文刨得咁辛苦...

活動分左3部份 ~
- 介紹以 Windows 為作業系統ge ASUS 產品啦
- 介紹以 Android 為作業系統ge ASUS 產品啦
- 簡單試用下


一黎我想講左部我想入手的.... T100

女仔重點須知講先 ~

產品尺寸 :	平板 : 263 x 171 x 10.5 mm (寬x長x高) 底座 : 263 x 171 x 13.1 mm (寬x長x高)
重量 :	平板 : 0.55 kg 底座 : 0.52 kg
介面 :	1 x Microphone-in/Headphone-out jack 1 x USB 3.0 port(s) 1 x Micro USB 1 x micro HDMI

電池方面.... 長達 11 小時電池續航力 .... 一整晚自閉煲劇絕對無問題
前鏡頭 120 萬像素 ~~

重量黎講，合拼後佢唔算特別輕
但如果當佢係notebook看待，哩個重量佢又OK喎~
不過其實大家都唔會無時無刻吉住個底座keyboard架啦 ~
都係有需要先會帶埋出街 ~
不過女仔揀時要小心D ~  因為記住佢始終係用緊windows OS,
個人認為比較適合文書用家 ~ 因為 App 暫時始終有限 ~
文書用家係最大得益者（應該係）, 因為隨機已安裝Microsoft office !!

CPU是用 Intel Atom Z3740 1.33GHZ，四核心的說！！
記憶體 2G，觸控螢幕支援五點觸控 ~ 

容量方面 ~
淨係平板 ~ 有32 / 64 GB 選擇 ,
keyboard有 500 GB ~
覺得唔夠用? 好~ 比多D~
贈送一年ASUS WebStorage 服務 ~ 容 量 沒 上 限 !

我呢，就真係好中意佢可以拆可以合拼
絕對因應自己當日帶出街想做乜野而決定點做
有keyboard打code 真得心應手好多 ~ （普通打字我無所謂．．．）
正！





Android 方面有 ASUS MeMo Pad 8
ASUS亦都搵左兩位Blogger 親身試用後 ~ 黎哩個workshop分享~

根據兩位分享 , 哩部機ge賣點佢地似乎都好"享受"
包括影相可以有前後3秒 ~ 即係如果我影貓貓, 補捉左但佢突然跳  ~
我都可以退番3秒影到佢個好得意ge貓樣 ~ 而不是鬼影 !
除左影貓貓, 自拍都不錯, 因為有很好的 "美肌功能" A_A
我哩D要呃人先要呃自己ge人, 應該好0岩用呢 ~ 嘿嘿 ~


而Blogger Judy 講左一樣好緊要ge野
 " 178 度可視角度IPS 螢幕 " << 本身聽落覺得哩個功能好廢
但Judy講話, 訓係度睇劇都無問題
真係叮左一聲 ~ !! 訓係度睇劇真係成日都唔知點算好 lol !!





ASUS係平板方面都有唔少型號
大家可以根據自己需要～上去官網作個比較呀！



而我..... 最近學緊寫Android app ~ 又頭痕究竟揀T100定揀Android OS ge 型號好呢!!!
我都要比較下先...

ASUS 華碩電腦股份有限公司

官網 : http://www.asus.com/hk/

* 活動由ASUS 及 Fashion & Beauty 舉辦
* 資料由ASUS / 官網提供 ~

Canmake Kira Kira 水影之美妝班 ~ 教你化個BlingBling妝 ~

有見過我化妝ge朋友，都應該知我好中意化閃閃眼 ～ 咁今次CANMAKE有個閃閃化妝班，我梗係到啦～ （KiraKira 係日文~ ~ 跟我讀一次~ 「key啦 Key拿」 ~ 意思係閃閃~ 即係BlingBling ! ）

香港女仔呢，通常都係會化韓妝啦，日系妝啦～
我相信後者係比較普遍，而且化妝時比較 "得心應手" ~ 簡簡單單三兩下手勢已經有種甜美感 ~
而我自己，都唔知化出黎係乜系，但買化妝品的話都係偏向揀日本品牌 ~ 亦都買過CANMAKE眼影（好幼滑好閃！但已經粉碎左！）

咁呢，小女子大鄉里，我本身以為係求其有間房，就有一堆office枱，大家就係度化個妝～　好似工聯會上堂咁～　原來CANMAKE本身有個化妝教室 ~ 地點極易搵，係旺角家樂隔離棟商廈(柏裕中心)．一入到去～　見到超級多化妝品，平時都只係LOGON / 莎莎有個架 ~ 而哩度係超級齊全 ~ 心情開始好興奮.... ( 女人 ! )

今日就請左由日本遠道ge導師教大家化妝 ～
教之前，就有請美人Cherry黎share下"CANMAKE心得"先啦 ~  之後開始喇 ~

就請阿Stella妹出黎做 磨dell !~

今次導師就利用左以下幾種化妝品，去化哩個Kirakira妝

Marshmallow Finish Powder 透亮美肌蜜粉
Glow Fleur Highlighter 花漾瑰麗造影粉（光影粉）
Nose Shadow Powder 鼻影粉
Juicy Pure Eyes 晶瑩三重眼影 （大地色）
Strong Eyes Liner 強效眼線筆（啡色眼線液）
Glow Fleur Cheeks Glow 花漾瑰麗胭脂（提點我地要係胭脂上打圈打圈再打圈！！　最後我都試過，唔洗怕重手，因為真係要打圈先上得好）
Dual Eyebrow Stick 雙色粗眉筆
GOKUBUTO 濃密睫毛液

真係三兩下手勢 ~ !! 就幫Stella 化完妝喇 ~ 甜美Stella妹~~~~
雖然係日本導師，雞同鴨講 ~ （都有翻譯ge）
但佢並唔係自己化化化化 ~ 搞掂 ~ 每一個動作都明顯係慢左, 比我地知個手勢應該係點控制會化得靚d

話晒都係 "化妝班"，各位囡囡自己埋位郁手試試佢啦！！
講多兩句哩個化妝室設備，都幾齊全~ 所有工具（掃, 粉撲, 睫毛液個"刷"） ~ 職員都會另外提供比你 ~ 絕對衛生！而枱上都有齊今次化Kirakira 妝需要ge化妝品添 ~ （職員妹妹見我pat陰咁"瀟灑"，仲主動問我洗唔洗要髮夾）

化完喇 ~ 影張相先..
（我知我個人本身都唔甜美，so9ry囉 ~）

咁睇下D 化妝品啦

當中碎粉&蜜粉 係我最想介紹ge!
原來係佢個盒ge設計

如果係fd底，都知我一直想搵ｄ" 有鏡 " , " 揭蓋"  式 碎粉盒 ~
朋友一直都話我無鬼聊，同埋話無哩ｄ野
今次黎到canmake化妝班，竟然比我遇到佢！！！！

~ 綿柔美肌蜜粉 Marshmallow Finish Loose Powder (2色 / HK$ 108 / SPF30 PA++) ~ 

( Sorry , 燒左燈膽, 後期相換左白燈 XD )

質地幼滑透薄，但有一定遮遐度，除左定妝，佢控油功效好好～

所以都提點一ｄ乾人，用佢前就要"睇下咩環境"，因為佢控油力絕對唔係流
好似我咁，皮膚超乾得黎無油，留係冷氣房用左佢只會增加崩緊。
但夏天室外用絕不是問題！！

唔中意用碎粉, 想遮遐度高dd ~
可以揀以下哩一種（包裝設計又係勁喜歡）

~ 透亮美肌蜜粉 Marshmallow Finish Powder (2色 / SPF26 PA++)  ~

遇著夏季毒太陽，防曬真係好需要補！
化左妝又點補防曬液 / 霜？
無論係碎粉定粉餅 ~ 都有防曬功效 ~
哩兩盒粉絕對係補妝補防曬好幫手 ~


再黎想介紹哩一支

~ Canmake Dual Eyebrow Stick 雙色粗眉筆 ~ (2色 / $68)

平時大家通常都係用鉛筆狀 , 眉膏 , 眉粉
（我自己用開實色眼影粉）
而哩支好似蠟筆咁，都有成4.9毫米粗，闊頭雙色設計
唔會痴立立（我試過有Ｄ係成條眉畫到GEL到一舊舊...）

咁雙色係為左令眉妝更自然，有深淺層次效果
就可以簡單用淺色係眉頭開始畫畫畫到眉心就轉用深色～尾部就用晒深色

產品顏色就有自然啡（深啡 x 淺啡）＆ 淺啡（橙啡 x 炭啡）～
因應大家髮色就揀邊種啦

不過有少少建議，新開筆時可以搵畫幾筆落紙巾整圓滑少少Ｄ邊先 ~ 咁會畫得順Ｄ

我仲有利用佢黎試畫我條危機髮線..... （畫左戴頭COOL會順眼好多）

CANMAKE

網址：www.canmake.com.hk
CANMAKE化妝教室：旺角柏裕商業中心1733室

要扮貴婦，首先要了解真正貴婦！《明天是舞會：19世紀巴黎女性的社會史》

近年，開始確認自己對ｄ咩有興趣～
例如...
原來～我是莓控；
原來～我是系帶控（唔係束綁PLAY!）
原來～我很喜歡了解人類各階段的生活
好奇怪呀可？　原來中意ｄ咩都要確認～
以前，我睇TBB古裝劇，聽到d 特別ge 詞語或者古代生活方式
我都會上網維基一下～例如咩？！簡單ｄ就係 如何成為太監!
又或者唔洗TBB ~ 自己都會無端端諗，未有M巾究竟D人用D咩"止血" ? 又GOOGLE一先~
我一直只係諗自己係咪太無聊~

直到前排同Mr.K 去誠品 ~ 我首先話要去搵《原來，古羅馬人是這樣過日子！》
（哩本書係我年幾前去打書釘時睇到好開心ge書，但最後無買到）
當時搵唔到，但我見到一本《明天是舞會 - 了解十九世紀法國女性的時尚生活》
雙腳停留，兩眼發亮，打下書釘先～！
（其實本身係2006年出版，一早睇左ge人唔好噓我，你出番去就ok）

Mr.K 講左一句「點解你咁中意睇D古人生活ge野」
我頓時心諗 " 呀.. 我好似真係咁架喎 "
哈哈，雖然我唔知自己係咁，不過我又即時搵到答案.. 「歷史中，我對戰爭無興趣，戰爭唔可以話關每一個人類事，但每一個人都要過生活！想知佢地同自己生活有咩唔同」

幾日後，我就趁一個人時衝左上誠品買哩本書番黎～um... 用３日KO左佢~

哩本書ge作者係一個日本人，一個法國通～
寫作方式並唔係平鋪直敘講19世紀d 女人點點點點
而係利用19世紀著名作家ge作品作參考，從當中一字一句去了解當時生活
最主要作品係巴爾札克《兩個新嫁娘》~ 及 福樓拜《包法利夫人》等等

我好少可睇書連前言都睇埋，但真係連前言，註釋都覺得有趣～！
睇完成本書之後，我真係好想睇巴爾札克ge作品 ~ !!

講下本書內容；總共分左16章

- 少女的啟程

- 修道院的寄宿學校

- 她買了巴黎的地圖

- 從修道院到社交界

- 貴族的婚姻

- 公爵夫人的日常生活（之一── 優雅的每日活動）

- 公爵夫人的日常生活（之二──漫步杜樂麗公園）

- 公爵夫人的日常生活（之三──漫步香榭儷舍）

- 參加舞會（之一）

- 參加舞會（之二）

- 憧憬的舞會

- 歌劇院的包廂座

- 化妝舞會

- 慕薩德的歌劇院化妝舞會

- 沒有嫁妝的結婚方法

- 戀愛和結婚

一直都知道，貴族生活不得了～ 浮誇，奢華～女人玲瓏浮凸，坦胸露脾

不過由第１，２章起；我已經睇到眼都凸「下? 無得繼承財產ge女就係修道院過世?!（貴族當中）」
第４章，貴族婚姻；比起一夫多妻來得更離譜；我睇到嘩嘩聲～
而貴婦人呢？每日生活就係訓醒扮靚，食飯，出街，昅仔/ 比仔昅，去d 懶有藝術氣息ge活動，去舞會，番歸訓覺
嗚呀～～～～～～！　我想做一星期貴婦人呀！！！　一星期夠架喇！！

而貴族中的女孩，對"感情" ,"伴侶"  ge想法 就係大家現今狂屌ge "公主病"
但係佢地當時黎講，一班女孩子係修道院長大，只能從懷春小說知道"男人" / "戀愛" 事～ 有憧憬係好合理
所以其實大家可以唔洗直接屌人公主病~ 可以「你當自己十九世紀貴婦呀？」
不過可能佢會仲高興～

咁書名係" 時尚生活 " ~ 咁梗係有講衣著啦
書中有一部份我係好喜歡ge「時尚畫卡」
當時佢地已經有時裝雜誌，真不愧係時裝之都（先不論佢係咪比紐約爬左頭）
價錢仲唔平架，但鄉下ge婦人，即使買唔起貴布料造衫，都想追上潮流，買時尚雜誌想知道巴黎發生咩事；

「然而， 在十九世紀前葉的社會，並沒有所謂的成衣，即使是為了初次進入社交界所穿著的服裝也沒有辦法在精品店或百貨公司買到，因為，在當時，設計、材料和縫紉這三個元素各自獨立，就算想訂做新裝，也必須按順序地依照這三個步驟來進行。

首先，雖說是設計，但卻遠比現在更順應穿著者的主體性，也就是說，並非有一個稱為「設計」的職業，不管是誰，只要他想試著做這樣的衣服來穿，那就依據那個想法來購買布料，然後再交給縫紉店就可以了。但是，不管設計再怎麼自由，也不能任意做什麼古怪的設計，它自然有一套規範，而這也就是所謂的流行。

那麼，在沒有設計的時代，「流行」是怎麼決定的呢？像露薏絲的媽媽修律公爵夫人一樣的上流社交界明星仕女就是最棒的設計者，同時也是潮流的開創者」

書中有提及過，係哩ｄ"設計者"造衫期間，就會有人黎訪問～再畫下" 時尚畫卡 "，刊登係雜誌中～　而某ｄ時尚畫卡，都刊登左係我手中哩本書入面（不過有ｄ唔鋸，我google到前幾版果ｄ好似colourful d.. ）
對於熱愛宮廷服ge我，我真係睇到好高興！！
貼幾張閃卡比大家睇！（但唔知點解... 全部人都係Ａ字膊 lol）

如果叫我用一句說話講１９世紀貴婦係點
UM.....  「貴婦人生活就是為了擺靚靚，人生只是為了吸引男人注意」


發完白日夢喇 ~ 換番套柒頭睡衣訓覺啦 ~ 

=======================================

明天是舞會: 19世紀巴黎女性的社會史

作者  ／  鹿島茂

譯者  ／  吳怡文

出版社 ／ 如果出版事業股份有限公司

出版日期 ／ 2013/10/11

商品語言 ／ 中文/繁體

=======================================